నా కలలు సంద్రం లో అలలు
నిజమయ్యెందుకు విరిసిన నా కల తపిస్తుంది
తీరం చేరలని ఎగిసిన ప్రతి అల ప్రయత్నిస్తుంది
కాలేని నా కల కనుమరుగవుతుంది..
చేరలేని అల సాగరంలో కలిసిపోతుంది
అయినా భాధ పడవు..విశ్వాసాన్ని వీడవు
మల్లి కొత్త రంగులు పులుముకుని వస్తాయి నా కలలు
మరింత వేగంతో ఎగబడతాయి అలసిపోని ఆ అలలు
అందుకే నా కలలు సంద్రం లో అలలు !!
అనుకున్నది సాధించాలని ఆశిస్తే సరిపోతుందా ?
అడుగైనా కదపకపోతే ఆకాశం అందేస్తుందా ??
ఉలి దెబ్బలు తొలచకపోతే శిల చక్కని బొమ్మౌతుందా ?
పలుగు నేల తగలకపోతే పంట వెలుగు మనదౌతుందా ??
వేలి కొసలు మీటకపోతే వీణపాట వినిపిస్తుందా ?
వేల శృతులు కలవకపోతే బృందావనమనిపిస్తుందా ??
యోచనకే పరిమితమైతే ఆశించిన గమ్యం దొరకదు !
ఆచరణే కరువై పోతే ఆశయాలకర్ధం మిగలదు !!
గడ్డిపూల గుంపుల అంచున మెరిసేటి
ఓ మంచి ముత్యమా జారిపోకుమా...!
అలసి సొలసి నా సఖుడొస్తే
పాదాలు కడుగను నీవు కావాలి సుమా...!!
గుడ్డిదీపపు చిన్న వెలుగున
కనిపించు ఓ కాంతి కిరణమా ఆరిపోకుమా...!
యే నిశి రాత్రో నా ప్రియుడొస్తే
దారి చూపను నీవుండాలమ్మా..!!
మసక బారిన నా కన్నుల
నిలిచిన ఓ జీవమా నన్నిడిచిపోకుమా...!
నా కై నా ప్రాణనాధుడొస్తే
అతని పాదాల చెంత విడువడానికై కాస్సేపు ఆగమ్మా...!
ఊహల అంచున
ఆశల అందలంలో
తొణికిసలాడుతున్న స్వప్నమా
నిజమై నాకు కనిపించు
దరిదాపున కనిపిస్తూ
అంతలో మాయమై దూరమయ్యే
ఎండమావిలా మారకుమా
ఓ స్వప్నమా ! ఓ స్వప్నమా !
నీ అరుణవర్ణం నాలో ఆశలు రేపే సువర్ణం
సిరులతో కాన లేని నీ హిమపాతంలో
నాకే సొంతముగా కరుణించుమా
ఓ స్వప్నమా ! ఓ స్వప్నమా !
కోరికల కొండల ఆవల
నింగి నేల కలిసే అంచున
అందంగా నిలబడి ఉన్న తృప్తిని చూసి
అందుకుందామని వెర్రి అశలతో పరుగెడితే
ఎన్ని కొండలు దాటినా
తృప్తికి, నాకూ మధ్య దూరం తరగడం లేదు
అలిసి, విసిగి వెనుదిరిగిన నేను
ఒక్కమారు నాలోకి తొంగి చూసాను చిత్రం !
అది నాలోనే నిండుగా ఉంది !!
